بقلم : يوسف القاضي
مرة من المرات في شهر رمضان أظن وأنا بالصف الأول أو الثاني الإعدادي ، عملت خناقه لرب السما قدام باب مدرستنا ، كنت مشهور بين طلبة مدرستي " الإعداديه العامه " بإني تلميذ شقي وراسي ناشفه وبتاع مشاكل ، بس عمري ما إفتريت علي حد ، ولا جريت شكل حد ، فأنا كنت من النوع اللي إذا حد طول إيده أو لسانه عليا ، مكنتش أسيبوا حتى لو صار فيها دم !!.. المهم عملت خناقة مرتبة ومنظمه مع سبق الإصرار والترصد مع بعض طلبة مدرسة التجاره اللي خلف مدرستنا ، بسبب وشايه من بنت قريبتي بأن أحد زملاءها بالمدرسه دائم التحرش بها ، كان متهيألي ساعتها هكون قدام قريبتي أسد مغوار ، لكن ليس كل ما يتمناه المرء يدركه ، فمن سوء حظي أن الذي تحرش بها كان ينتمي إلي فريق " الفتوه " بالمدرسه فأكلت علي يديه وأيدي الذين معه علقه ساخنه لم ينالها حرامي في سوق ، كما يقولون ، وكله بسبب البنات ، الله يقطع البنات وسيرتها ، ماعلينا ، المهم أسرعوا إلي زملائي فور علمهم بهزيمتي النكراء ، وخلصوني من بين إيدي الأعداء بجهد جهيد ، وخدوني علي حنفية مدرستنا وغسلوا لي وشي من الدم ، وهدوني ، وبعد أن هديت وهديت أعصابي راضوني بطبق كشري من عند عم " عاشور " اللي كان دايما" بيقف بعربيته المتسخه قدام باب المدرسه ، والذي كان أحد شهود الواقعه ، مع ساندويتشين فلافل من مطعم المقدس " أبو وصفي " ، وقزازة كازوزه من عند عم " صالح " ، نهايته ، الهدف من القصة إني وأنا بآخر شفطتين من قزازة الكازوزة تذكرت وقتها أني كنت " صايم " فتوقفت فجأه عن تكملة شربها .. زمايلي قالولي : ليه مكملتش شرب القزازه ؟؟!
قلتلهم : سامحوني مش هقدر أكملها فأنا " صايم " !!
،لا زلت متذكر أنهم قالولي :
"يخرب بيت أمك " صايم وضارب طبق كشري كبير، وساندوتشين فلافل ، وقزازة كازوزه مافاضلش فيها غير شفطتين ؟! ، ليه هو انت لو في غير رمضان كنت عملت إيه ؟؟!
ايييييه الله يرحمك يا عم " أديب " فراش المدرسه اللي خلاني كملت شرب القزازه عندما قال مقولته الشهيره وقتها :
" ليس علي المقتول حرج " !!
مات أديب الفراش ، ومات عاشور بتاع الكشري ، ومات أبو وصفي بتاع المطعم ، ومات صالح البقال ، حتي البنت قريبتي ماتت وغارت في داهيه ، كلهم ماتوا وراحوا زي ما راحت الأيام الحلوه ، رحمة الله علي الجميع !!
بس نفسي أعرف اللي ضربوني ياتري ماتوا وغاروا في ستين داهيه وألا لسه عايشين ؟؟!
نبذة عن الكاتب
0 Comments
المشاركات
