يتعرض العديد من الفتيات والشباب لمواقف محرجة أثناء ما يسمى بـ "جواز الصالونات"، وهو ما يجعل البعض قد يقلع عن الفكرة بالكامل، وفى إطار ذلك روى نشطاء مواقع التواصل الاجتماعى مواقفهم الطريفة والمحرجة في "زواج الصالونات".
"عذاب القبر"
قالت منى: "مرة جالي عريس وأهلي سابونا مع بعض شوية فكان في كمبيوتر في الأوضة، فقالي ده بتاعكوا قلتله لاء ده إحنا سارقينه النهاردة عشان نعمل بيه منظر قدمكوا، الله يمسيه بالخير من يومها ماشفتوش".
وروت نهى: " أول ما جه النور قطع، قولتله أنا بخاف من الضلمة جدا، قالي أمال هتعملي إيه في عذاب القبر".
"شقة في مصر ودبى"
وأضاف أحمد: "رحت أقوله ياعم عايز أتجوز بنتك، قالي معنديش بنات للجواز، وهو عنده جوا".
وقال إيهاب: "أنا عايش في دبي وروحت أخطب بنت عايشة هنا في دبي، باباها طلب مني طلب غريب، بيقولي عاوز شقة في مصر قولت أكيد وموجودة إن شاء الله، الغريب بقي عاوز شقة ملك في دبي كان ردي عليه مش عاوز حضرتك تفتحهم على بعض ونخلي الريسبشن في السعودية".
"العروسة مرتبطة"
وروي محمد: "روحت مع واحد صاحبي يخطب صالونات وخدنا معانا علبة جاتوه، ودخلنا على الناس وقعدنا مع أبو البنت وأمها، وبعدين صاحبي العريس طلع البلكونة على أساس يقعد مع البنت شوية لوحدهم لقيته رجع وشه جايب كل الألوان ولقيته شال علبة الجاتوه ومشي، بنادي عليه هو ولا هنا جريت وراه بقله في إيه، يقولي البت لسه بقولها إزيك قالتلي بص أنا مرتبطة وبحبه جدا ومكنتش موافقة بس أبويا قالي اقعدي معاه الأول فـأنا بقلك على اللي فيها، قلتله طيب أخدت الجاتوه قالي خسارة فيها وفي أبوها".
"بابا قاله سيب طبق البسبوسة"
وتذكرت آية: "مرة كان متقدملي عريس ومكنش قايل إنه جاي ولا حد يعرف، المهم جه هو ومامته ومرات أخوه وكنا ساعتها بنعمل الغدا وكنا عاملين محشي المهم هو أول ما دخل قال الله أنا بحب المحشي أوي عزمنا عليه عزومة مركبيه كده، كل معانا قال ماشي المهم أكل وهو ومامته ومرات أخوه، وبعدين بابا قالوه بنتي لسه بتدرس مش هينفع، وبردو فضل قاعد ومرة واحدة لقيناه بيعطس وبعدين قال ده أنا شكلي جالي برد، معلش هاتيلي برتقانة من اللي على السفرة ده، وكان يوم مسخرة وكان جايب معاه بسبوسة ولما في الآخر بعد 3 ساعات قاعد معانا وفهم إني مش هتجوزه، قام وخد معاه طبق البسبوسة قام بابا قاله سيب الطبق واطلع بره، وهو يقوله لأ ده محصلش نصيب لازم أخده وكان يوم مسخرة".
"بيأكلنى الجاتوه"
وقالت نهلة: "اتقدملي واحد قبل كده أول ماسابونا نقعد لوحدينا عشان نتكلم شوية لاقيته مسك الجاتوه وعاوز يأكلني، قولتله إنت بتعمل إيه إنت عبيط قاللي أصل أنا حاسس إني أعرفك من زمان".
وأضافت هند "واحد قالي إنتي في كلية ولا في جامعة".
العروسة متجوزة
وروي شادي: "شفت واحدة رحت عشان أخطبها لقيت سيادتها متجوزة وعندها أربع عيال، المشكلة مش في كده المشكلة إني طلبت أخطبها من جوزها، كسفة وعلقة مع بعض".
وتذكرت رنا: "كان متقدملي عريس مرة، وفضلو يتكلموا هو ومامته مع بابا وماما وبعدين مامته قالت مش هنشوف العروسة ولا إيه، ماما بتقول لأختي الصغيرة نادي أختك، قالتلها ماهي قاعدة ورا الباب على الكرسي الصغير وسامعة كل حاجة، يومها فضلوا يتحايلوا عليا أطلع أسلم وأنا أبدا مش قادرة من كتر الضحك والكسوف".
"إحنا دايما بنجيب حلويات"
واستطرد معتز: "عن أول تجربة رايح أخطب وداخل من باب العمارة، لقيت أبو العروسة داخل وشايل صنية بسبوسة، أول ماشافني حس كأنه اتقفش فاتلخبط وقالي على فكرة دي مش ليك ده إحنا دايما كدة بنجيب حلويات".
نبذة عن الكاتب
0 Comments
المشاركات
